Бүгін, 18:06
Көкшетауда жол-көлік оқиғасынан кейін көлік иесіне қатысты қозғалған қылмыстық іс рақымшылық туралы заңның негізінде тоқтатылды, деп хабарлайды kznews.kz.
Іс материалдарына сәйкес, жергілікті тұрғын көлігін жүргізуші куәлігі жоқ жұбайына басқаруға берген. Салдарынан тәжірибесі жоқ жүргізуші жаяу жүргіншіні қағып, адам өліміне әкелген жол апаты болған.
Осы оқиғадан кейін автокөлік иесіне қатысты Қазақстан Республикасы Қылмыстық кодексінің 349-бабының 3-бөлігі бойынша қылмыстық іс қозғалды. Бұл бап көлік құралын басқару құқығы жоқ адамға көлікті беріп, оның салдарынан адам өліміне жол берген жағдайлар үшін жауапкершілікті көздейді. Аталған баптың санкциясына сәйкес, айыпталушы үш жылға дейін бас бостандығынан айырылуы мүмкін еді.
Алайда сот істі қарау барысында елімізде Конституцияның қабылдануына байланысты жарияланған рақымшылық туралы заңды қолданды. Соның нәтижесінде көлік иесі рақымшылыққа ілігіп, оған қатысты қылмыстық іс қысқартылды.
Осылайша сот қылмыстық қудалауды тоқтату туралы шешім қабылдап, іс рақымшылық актісінің негізінде аяқталды.
