19 қараша, 2025
Түркістан облысында 12 адамның өмірін қиған өрттен аман қалған үш адамның бірі есін жиды, деп хабарлайды kznews.kz.
Облыс әкімінің бірінші орынбасары Зулфухар Жолдасовтың айтуынша, науқастың жағдайы жақсарып келеді.
“Зардап шеккендердің бірі есін жиды. Қажет болған жағдайда үшеуі де аудандық ауруханадан Астанаға санитарлық авиациямен тасымалдауға дайын”, – деді ол.
Жолдасов оқиға бойынша тергеу жалғасып жатқанын атап өтті.
“Қайғылы оқиға мұқият және жан-жақты тергеледі”, – деді шенеунік.
Бұған дейін үш адамның да жансақтау бөліміне түскені хабарланған. 1986 жылы туған ер адам өрттен өз бетімен шығып, денесінің 12%-ы күйген. Ал 1991 жылы туған науқас пен 2018 жылғы қыздың денесінің тиісінше 30% және 11%-ы күйіп, екеуі де өкпені жасанды желдету аппаратына қосылған.
