Головкиннің промоутері «Головкин-Канело» реваншының қашан өтетінін айтты
Геннадий Головкиннің промоутері Том Леффлер GGG мен мексикалық боксшы Сауль Альварес арасындағы үшінші жекпе-жектің 2019 жылдың желтоқсан айында ғана өтуі мүмкін екенін айтты. Бұл туралы Qamshy.kz ақпарат агенттігі fightnews.info порталының дерегін негізге алып хабарлайды.
Том Леффер әзірге жекпе-жекті тікелей эфирде тарататын телекомпаниямен келісімге келмегенін айтты.
«Ең тиімді ұсыныстарды қарастырып жатырмыз. Бірінші келісімшартқа қол қойып алайық, содан кейін ғана жекпе-жекке қарсылас іздейміз. Меніңше, Головкиннің келесі кездесуі келер жылдың көктемінде өтеді. Алайда, Golden Boy промоутерлік компаниясымен жүргізіп жатқан келіссөздер бұл кездесуге қатысты емес. Олар Головкин-Альварес жекпе-жегін келер жылдың соңында өткізуді ұйғарып отыр, мамыр айында «Канело» өзге боксшымен жұдырықтаспақшы. Сондықтан, Головкин мен Альварес арасындағы үшінші жекпе-жекті қыркүйек немесе желтоқсан айларында көруіміз мүмкін», — деді Леффлер.
Еске салайық, қос боксшының арасындағы алғашқы жекпе-жек төрешілер шешімімен тең аяқталған болатын. Ал, екінші кездесудегі жеңіс тағы сол төрешілердің шешімімен Альвареске берілді.
