Жаратылыстану пәндерін ағылшын тілінде оқытатын мұғалімдерге қолдау артады

Жыл басынан бері жа­ңаша білім беруге кіріскен алматылық мұғалімдердің 70%-ның жалақысы 30 пайыз­ға көбейген. Ал қыркүйектен бас­тап ұлттық кәсіби тесті­леу­ді еңсерген 1293 ұстаз ал­ғаш рет өздерінің қызметтік еңбек­ақысына 30-дан 50 па­йызға дейін қосымша ақы алатын болады. Бұл тура­лы қаланың педагогтар қауы­мымен кездескен шаһар бас­шысы Бауыржан Байбек айт­ты. Әсіресе физика, химия, информатика пәндерін ағыл­шын тілінде оқытатын мамандарға айрықша жағдай жасау көзделген. Мұндай мұ­ғалімдердің қызметтік жала­қыларына қоса 200%-дық кө­лемде қосымша ақы төленеді. 

Қаланың үздік педагогтарымен кездескен қала әкімі Мемлекет басшысының Жол­дауын жүзеге асыру аясында Білім және ғылым ми­нис­­тр­­лігінің «Педагог мәр­те­бесі туралы» және «Оқушы мен мұғалімнің жүктемесін азай­ту бойынша бірқатар заң актілеріне өзгерістер мен қо­сымшалар енгізу туралы» заңдардың жобаларын да­йындағанын атап өтті. Оның сө­зінше, қаладағы барлық ұс­­таздар мен ата-аналар қауым­дастығының өкілдері аталған заңды талқылауға бел­сенді түрде қатысуы керек.

«Ең маңыздысы, жобадан қазақстандық педагог­тер өз жұмыстарының жоға­ры бағаға ие екенін, білім сала­сында туындаған барлық мәселеге, оқушылар мен мұ­ға­­лімдерге айрықша назар аударылаты­нын көрді. Сіз­дердің қаланың білім саласын дамытуға қосқан үлес­те­ріңіз өте жоғары, жауап­ты әрі қиындығы мол ұстаздық қыз­­меттеріңізге алғыс айтамын. Оқушылардың түрлі бі­лім сайыстарында би­ік же­тіс­­тіктерге жетуі жеке кәсі­би бі­ліктіліктеріңіздің сапасын ай­қындай түседі», деді Б.Байбек.

Алматы қаласының білім беру жүйесінде 1078 білім беру ұйымы жұмыс істесе, соның 700-ден астамы мектепке дейінгі білім беру ме­кемесі. Мәселен, соңғы екі жылд­ың өзінде қалада 10,4 мың адамға арналған 262 мек­тепке дейінгі мекеме ашылған. Бүгінде мектепке дейінгі білім беру және тәр­биелеу ісімен қаладағы үш жастан алты жасқа дейін­гі жеткіншектердің 81,2 пайы­зы қамтылып отыр. Мек­тептер мен мектептен тыс ұйым­дарда іске қосылған роботтехника және 3D модельдеу үйір­мелерінде 3 мыңнан астам шәкірт білім алады.

Арман ОКТЯБРЬ,

«Егемен Қазақстан»

АЛМАТЫ