Туыстары іздемеген. Науқасты екі күнде бір келіп «жұбатқан» кептер жүректерді елжіретті
Рамазан Алиаров есімді азамат әлеуметтік желіде жантебірентерлік оқиғаны бөлісті. Көпшілікті сүйсіндірген оқиғаның басты кейіпкері бұл жолы адам емес, кептер болды.
«Осы суретті түсірген медбике: «Бұл науқастың ауруханаға келіп түскеніне 23 күн болды. Осы 23 күн ішінде оның отбасынан ешкім қалын сұрап келмеді. Есесіне мына кептер екі күнде бір келіп, төсегінің үстінде отырады. Кептер біраз уақыт отырған соң қайтадан көкке ұшып кетеді», — деп жазды.
Артынша төсекке таңылып жатқан ер адамның күн сайын аурухана маңында отырып, кептерлерге жем шашқаны белгілі болды. Солардың ішінде осы кептер де болған екен.
«Адамдар ұмытады, алайда мына құс есінде сақтаған!» — делінген жазбада.
