Түркістанда жыл үздіктері марапатталды — Аймақ|28 Желтоқсан 2018, 21:18

Түркістан облысы, BAQ.KZ. Түркістан қаласында 2018 жылды қортындылаған салтанатты шарада еңбегімен дараланған жыл үздіктеріне құрмет көрсетілді.

«ХХІ ғасырдың белсенді азаматтары бәсекеге қабілетті болуы тиіс. Қазіргі кезеңде елге қызмет етіп отырған азаматтар шығармашылыққа бейім, еркін ойлы, креативті әрі зиялы болғаны жөн. Аталған ізгі қасиеттер барлық сала қызметкерлерінің бойынан табылуы қажет. Бұл — бүгінгі заманның талабы. Бүгін талай сындардан сүрінбей өткен нағыз дүлдүлдер ортамызға келіп отыр. Осынау жетістіктеріңізбен шын жүректен құттықтаймын! Алдағы уақытта да мемлекет пен қоғам мүддесі жолында талмай еңбек етіп, белсенді азаматтық ұстаныммен ортақ мақсатты жүзеге асыруға үлес қосатындықтарыңызға сенімдімін. Түркістанға қызмет ету — абыройлы міндет. Бүгінгі марапаттарыңыз сіздерге шабыт беріп, жаңа шыңдарға жетелейді деп ойлаймын», — деген облыс әкімі Жансейіт Түймебаев жылдың үздігі атанған азаматтарды марапаттады.

Салтанатты іс-шарада жылдың үздік 15 мекемесі мен кәсіпорнына марапат тапсырылды. Сонымен бірге, кәсіпкерлік, туризм, экономика, қаржы, руханият және мәдениет, денсаулық сақтау, спорт, құрылыс, білім, ауыл шаруашылығы, мұрағат, тұрғын үй – коммуналдық шаруашылық, энергетика және өзге де салалар бойынша 40 адам марапатталды.

Жылдың үздік спортшысы атағына Дидар Хамза ие болса, Әдіхан Полатбеков жылдың үздік құрылысшысы деп танылған. Жыл агрономы болып Болатбек Құметов танылса (Шардара ауданы), Мұқағали Кенжетайұлы жыл ақыны атанды. Байқап отырғандарыңыздай, марапатталғандардың арасында қарапайым жұмысшыдан бастап білікті басшылар да бар.

Сондай-ақ, осы жиында «Саланың үздік мемлекеттік қызметші» аталымы бойынша 7 адамға құрмет көрсетілді. Жылдың ең үздік қызметкерлері марапатталған жиында облыстың өнер ұжымдары өнер көрсетіп, концерттік бағдарламасын ұсынды.

Біздің Telegram-парақшамызда Қазақстанның маңызды жаңалықтары. Жазылыңыздар!