Қордай ауданының қос ауылындағы оқиғалар бір-бірімен байланысты ма?

Сортөбе мен Масанчи ауылдары бір біріне жақын орналасқан, дейді ішкі істер министрлігінің өкілі

НҰР-СҰЛТАН, 9 ақпан – Sputnik. Ішкі істер министрінің орынбасары Алексей Калайчиди Сортөбе ауылында болған полицейлермен текетірестің Масанчидегі жаппай төбелеске қатысы жоқ екенін мәлімдеді. Екі ауыл бір біріне жақын және Қордай ауданында орналасқан, деп хабарлайды Sputnik Қазақстан тілшісі.

«Сортөбедегі текетірес мүлдем бөлек жағдай. Біріншіден, біз өзімізді қорғай аламыз. Екіншіден, ол жерде полицейлерге қарсылық көрсеткен барлық адам жауапқа тартылды. Екеуі ұсталды, біреуінен ешқайда кетпеу туралы қолхат алынды», — деді Калайчиди Sputnik Қазақстан тілшісіне берген сұқбатында.

Оның айтуынша, Сортөбеде көлік мінген жастар жол жүру ережесін бұзған. Сол үшін тоқтатылған болатын. Артынан полицейлерге қарсылық көрсеткеннен кейін қылмыстық іс қозғалды. Енді әкімшілік жауапкершілік емес, қылмыстық жаза қолданылады.

Айта кетейік, Сортөбе ауылында полицейлерге күш көрсету оқиғасы 7 ақпанда күндіз болған. Ал кешкі сағат 19:00-де жақын жердегі Масанчи ауылында жаппай төбелес басталды. Оның арты тәртіпсіздіктерге ұласты.

Жаппай тәртіпсіздіктер неден басталды

Ресми мәліметке сәйкес, бәріне 5 ақпандағы оқиға түрткі болған. Екі ауыл тұрғындары арасында кикілжің туындаған. Ол күні Масанчиде үш адам мінген көлік жолмен келе жатқан, тағы үшеуі жүк көлігімен ауладан шығып жатса керек. Сөйтіп, біреуі екіншісіне жол бермей, жанжал туындаған. Әдеттегідей, сөзден басталған кикілжің төбелеске ұласып кеткен.

Сол күні полиция келіп, кінәлі адамдарды анықтады. Біреуі қамауға алынса, екеуінен ешқайда кетпеу туралы қолхат алынды. Жанжалға қатысқандардың ішінде жасы үлкен ер адам да болды. Оның сан сүйегі сынған. Дәл осы кикілжіңнің видеосы маңайдағы ауыл тұрғындары арасында тарап кеткен. Видеоны таратқандардың пікірлері де тым қатты болды.

Тағы оқыңыз: Назарбаева Қордайда қаза болғандардың жақындарына көңіл айтты

«Ол жақта әрбір ауылдың өз чаттары бар. Видео сол чаттарда тарап кеткен ғой. Егде жастағы адамның соққыға жығылғаны, сосын арандатушылардың теріс пікірлері бар. Осының бәрі екі күн бойы чаттарда жинала берген, жинала берген. Ал чаттарда қызу қанды жастар көп қой. Ауылдар да бір-біріне жақын орналасқан. Сөйтіп, жұма күні кешке қарай бәрі жұмыстан келгесін жиналып, Масанчиге шығып кеткен», — деді Калайчиди Sputnik Қазақстан тілшісіне берген сұқбатында.

Қордайдағы оқиға

7 ақпанда кешкі сағат 19:00-де Жамбыл облыстық полиция департаментіне «Қордай ауданының Масанчи ауылының жанында 70-тен астам адам төбелесіп жатыр» деген ақпарат түскен. Заңсыз әрекеттерді тоқтату үшін дереу полиция қызметкерлері жіберіледі. Сол жерде болған адамдар төбелесті видеоға түсіріп, әлеуеметтік желі арқылы таратқан.

Соның салдарынан жақын жердегі Ауқатты және Бұлан батыр ауылдарынан келген 300-ден астам азамат төбелеске қосылады. Екі жақ бір-біріне тас лақтырып, таяқпен ұрған. Тіпті, қару да қолданған. Салдарынан 8 адам қаза болды. Кейін ауруханада тағы екі адам көз жұмды. Жүздеген адам жарақат алды. Қырғызстан жаққа өтіп, емделіп жатқандар да бар. Жаппай тәртіпсіздіктер кезінде үш полицейге оқ тиді.

Тағы оқыңыз: Қордайдағы қақтығыс: Сапарбаев Қырғызстанға қашқандарға үндеу жасады

Қазіргі мәліметке сәйкес, 30-дан астам жеке үй, 15 сауда үйі мен 23 көлік зақымданды. Кеше сағат 21:00-ден бастап Қордай ауданында төтенше жағдай енгізілді.

Кеше ұсталған адамдардың көбісін босатты. Сотқа дейінгі тергеу шаралары қылмыстық кодекстің 272-бабы (жаппай тәртіпсіздіктерді ұйымдастыру және қатысу) мен 99-бабы (адам өлтіру) бойынша жүргізіліп жатыр.