Қазақ қызы тарихта тұңғыш рет Эвересті бағындырды
Анар Бурашева мен Мақсұт Жұмаевтан құралған Kazakh Everest Team қазақстандық командасы әлемдегі ең биік Эверест шыңын (8848 метр) бағындырды. Бұл туралы Kznews.kz ақпарат агенттігі хабарлайды.
Команда шың басына12 мамыр күні Непал уақытымен таңғы сағат 07:25-те жеткен.
«8 000 метрден жоғары биіктіктегі дауыл мен боран түріндегі күрделі ауа райы жағдайларына байланысты шыңды бағындыруға ниеттенген экспедициялардың көбі бағытынан кері қайтты. Тек бес елдің альпинистері Эверестке сәтті көтеріле алды. Олардың арасында біздің отандастарымыз – тарихта әлемнің ең биік шыңына шыққан тұңғыш қазақ қызы Анар Бурашева және еңбегі сіңген қазақстандық альпинист Мақсұт Жұмаев бар. Бұл оның Эверест шыңына осымен үшінші рет шығуы”, – деп мәлімдеді «Kazakh Everest Team» баспасөз қызметі.
Жалпы «Kazakh Everest Team» командасының шыңға көтерілуі бес тәулікке созылды: 7 мамырда базалық лагерьден (5 350 м.) шығудан басталып, содан кейін біздің альпинистер I Лагерь (6 100 м.) арқылы өтіп, одан соң II Лагерьге (6 400 м.), III Лагерьге (7 100 м.) көтерілді және IV Лагерьге (8 000 м.) жеткен соң одан әрі Эверестке шықты (8 848 м.). Анар Бурашева мен Мақсұт Жұмаев Эверест шыңында Қазақстанның байрағын желбіретті.
“Бүгін, 12 сәуірде Анар мен Мақсұт IV Лагерьде (8 000 м.) күрделі көтерілуден кейін төмен түсу үшін күш-қуатын қалпына келтіріп жатыр. Альпинистердің жағдайы қанағаттанарлық, бірақ күші сарқылып, базалық лагерьге түсу үшін біраз жинау керек болып тұр”, – делінген хабарламада.
