Павлодарда сайлау басталмай жатып, шу шықты — әкімдік жауабы
Павлодар облысы әкімдігі БАҚ пен әлеуметтік желіде облыс аудандарының бірінде Парламент Мәжілісі мен түрлі деңгейдегі мәслихаттар депутаттарының алдағы сайлауына негізгі және балама кандидаттардың тізімі туралы жарияланған ақпарат шындыққа жанаспайтынын мәлім етті, деп хабарлайды Uysmedia.kz.
Бұл жағдайға қатысты түсінік берген облыстық әкімдіктің баспасөз қызметі қала мен аудан әкімдіктері мұндай жұмыстарды жүргізбейтінін жеткізді.
«Сайлау процесін ұйымдастырумен аумақтық сайлау комиссиялары айналысады. Жергілікті атқарушы органдар өз кезегінде дауыс беруге арналған учаскелерді орналастыру үшін қажетті инфрақұрылыммен қамтамасыз етеді. Сонымен қатар, сайлаушылар тізімін қалыптастыру бойынша шаралар қабылдайды. Парламент Мәжілісі мен түрлі деңгейдегі мәслихаттар депутаттарын сайлау ашық әрі адал өтуі тиіс. Бұл маңызды қоғамдық-саяси іс-шара екені сөзсіз», – деді баспасөз қызметіндегілер.
Сондай-ақ әкімдікте халықты сайлауға белсенді қатысуға және тек сенімді ресми ақпаратқа сенуге шақырды.
