Павлодар облысында полицияға куәгер ретінде шақырылған ер адам өз-өзіне қол салды

Ер адамның денесі туысының үйінің кіреберісінде табылды. Павлодар облысы жеке қауіпсіздік департаменті басқармасы қызметтік тексеріс бастады

ПАВЛОДАР, 26 қараша – Sputnik. Полиция қызметкерлері жауап алғаннан кейін Павлодар облысының тұрғыны туысының үйінің кіреберісінде өз-өзіне қол салды. Бұл туралы оның туыстары әлеуметтік желіде хабарлады.

Туыстарының айтуынша, 21 қараша күні Ақкөл ауылының екі жылқышысын жұмыс уақытында учаскелік полицей Екібастұзға алып кеткен.

Жолда жылқышы үйіне соғып, киімін ауыстырған. Учаскелік полицей не үшін ұстағанын білмейтінін айтқан. Оған жылқышыны полиция бөлімшесіне жеткізу тапсырылыпты.

Марқұмның туыстары жауап алу сағат 23-30-ға дейін жалғасқанын айтып отыр. Бұдан соң ер адам үйіне хабарласып, келесі күні сағат 10:00-де жауап алу жалғасатынын хабарлаған. Үйіне келетін ақшасы болмапты (Ақкөл Екібастұздан 68 шақырым жерде). Сондықтан қаладағы туыстарына барған. Ол жерге полицейлер жеткізіп салыпты.

Тағы оқыңыз: 16 жастағы бозбала бүкіл отбасын балталап өлтіріп, өз-өзіне қол салды

Таңертең ер адам полицияға жиналып жатқан. Алайда сағат 11:00-де әйелінің қоңырауына полиция қызметкері жауап беріп, ер адамның өз-өзіне қол жұмсағанын айтқан.

Ер адамның туыстары куәгерлерді іздестіріп жатыр. Олар шындықты біліп, кінәлілер жазаланса дейді.