Nur Otan партиясы президенттікке өз кандидатын 23 сәуірде ұсынады
Қысқа сілтеме алу
Нұрсұлтан Назарбаев Nur Otan партиясы съезінің датасын белгіледі, съезде билік етуші партия атынан Қазақстан президенттігіне үміткер ұсыну жоспарланған
АЛМАТЫ, 10 сәуір – Sputnik. Nur Otan партиясының төрағасы, Елбасы Нұрсұлтан Назарбаев қоғамдық бірлестіктің XIX кезектен тыс съезін шақыру туралы қаулыға қол қойды.
«Съезд Нұр-Сұлтан қаласында 2019 жылы 23 сәуірде өтеді», — делінген Ақорданың хабарламасында.
Сейсенбі күні съезде партия мүшелері президенттікке өз үміткерін ұсынады.
Айта кетсек, 2019 жылдың 9 сәуірінде президент Қасым-Жомарт Тоқаев 2019 жылдың 9 маусымында кезектен тыс президент сайлауы болатынын жариялады. Көптеген саясаттанушының пікірінше, билік етуші партия өз кандидаты ретінде қазіргі президент Тоқаевты ұсынуы мүмкін.
Nur Otan – 1999 жылы ҚР Тұңғыш президенті Нұрсұлтан Назарбаевтың бастамасымен құрылған «Отан» партиясы. Партияның көшбасшысы ҚР Тұңғыш президенті Нұрсұлтан Назарбаев болып табылады.
«Отан» республикалық саяси партиясының алғашқы съезі 1999 жылы 1 наурызда өткен болатын. Ол кезде ішінде кәсіпкерлер, бюджет саласының және мемлекеттік қызметтің қызметкерлері бар партияның 400 делегаты «Отан» партиясының төрағасы етіп Елбасы Нұрсұлтан Назарбаевты бірауыздан сайлаған.
sputniknews.kz
