Михаил Саакашвили Украинаға оралды
Грузияның экс-президенті, Украинаның Одесса облысының бұрынғы губернаторы Михаил Саакашвили 29 мамыр күні Киевке келді.
28 мамырда Украина президенті Владимир Зеленский Саакашвилиге Украина азаматтығын қайтарған. Кейін Украинаның Варшавадағы консулы Саакашвилиге жеке куәлік тапсырған.
23 мамырда Саакашвили Зеленскийден өзіне Украина азаматтығын қайтарып беруді сұрап, хат жазған.
2004-2013 жылдары Грузияны басқарған реформатор Саакашвили 2015 жылы Украина азаматтығын қабылдап, Грузия азаматтығынан айырылған. Сол кезде оны Украинаның экс-президенті Петр Порошенко Одесса облысының губернаторы етіп тағайындаған. Саакшавили бұл қызметті аз уақыт атқарды да, 2016 жылғы қарашада үкіметті жемқорлықпен күресіне кедергі жасады деп айыптап, отставкаға кеткен. Содан кейін ол Порошенконы қатты сынай бастаған.
Петр Порошенко 2018 жыоы шілдеде шетелде жүрген Саакашвилиді Украина азаматтығынан айырған. Порошенко билігі Саакашвилиді Януковичтің «қылмыстық тобына қатысы бар» және «Ресейдің Киевке қарсы арандату жоспарының бір бөлігі» деп айыптаған. Грузия президенті болып тұрған кезінде Ресеймен қарулы қақтығысты бастан өткерген Саакашвили бұл айыптауларды «абсурд» деп сипаттайды.
Украина азаматтығынан айырылған соң Михаил Саакашвили ресми түрде азаматтығы жоқ адам деп танылып, Нидерландта тұруға ықтияр хат алған.
