Еліміздегі қылмыскерлердің 80%-ы жұмыссыздар – ІІМ

Орталық коммуникациялар қызметінде өткен брифингіде ІІМ Әкімшілік полиция комитеті төрағасының орынбасары Ренат Зұлқайыров елімізде қылмыстарды көбіне қандай санаттағы азаматтар жасайтынын айтты, деп хабарлайды kznews.kz сайты. 

«Қылмыс деңгейіне 250-ден астам фактор әсер ететіні ғылыми дәлелденген. Олардың қатарында әлеуметтік, экономикалық, географиялық, көші-қон, табиғи, демографиялық және басқа да жағдайлар бар», — деп мәлім етті Ренат Зұлқайыров

Спикер ұсынған ақпаратқа сәйкес, мына санаттағы қазақстандықтар жиі қылмыс жасайды:

— қылмыскерлердің 80%-ы жұмыссыздар;

— жасөспірімдер арасындағы қылмыстардың 47%-ын еш жерде жұмыс істемеген немесе оқымағандар жасайды;

— адамның жеке басына қатысты қылмыстардың 50%-ы мас күйде жасалады;

— елордада қылмыстың тең жартысын өзге аймақтардан келгендер жасайды.

Ренат Зұлқайыровтың мәлімдеуінше, бұл мәселелерді тек күш қолдану шараларымен шешу мүмкін емес. Сондықтан «Қоғаммен бірге қоғамдық қауіпсіздікті қамтамасыз етудің 2024-2028 жылдарға арналған тұжырымдамасы» әзірленіп жатыр.