Батыс Қазақстанда бірнеше кәсіпорын қызметкерлерінің жалақысы көбейді

0
102

Ең алдымен «Ақсайгазсервис» акционерлік қоғамы кәсіпорындағы жалақысы төмен қызметкерлерінің еңбекақысын 20%-ға көтеру туралы шешім қабылдады.

Қарашығанақ кенішінде, сондай-ақ Қашаған, Шынар (Чинарев) және Теңіз кен орындарында мұнай мен газды өндіру, өңдеу және тасымалдау нысандарын жайластырып, жоғары технологиялық сервистік қызмет көрсететін «Ақсайгазсервис» компаниясында 1800 адам қызмет етеді. Бұл – Батыс Қазақстан облысындағы ең ірі жергілікті 100% қазақстандық компания.

– Акционерлік қоғам басшылығы мен акционерлері Мемлекет басшысының бастамасын толығымен қолдайды. Кәсіпорында салыстырмалы түрде тө­мен жалақы алатын 327 қызметкердің жалақысын биыл қараша айынан бастап-ақ көтеруге шешім қабылданды. Бұл үшін кәсіпорын бюджетінен қосымша айына 3,5 млн теңгеден астам қаражат бөлінді. Сөйтіп «Ақсайгазсервис» АҚ жылына 41 млн теңгеден астам қаражатты жалақы өсіруге жұмсағалы отыр, – дейді кәсіпорынның кәсіподақ ұйымының төрағасы Өтепберген Қабиев.

Өңірдегі «Гидроприбор» АҚ, «Стройкомбинат», «Орал механика зауыты», «Жайыкагро-ЛТД» ЖШС, «Уральскагрореммаш», «Нұржанар» акционерлік қоғамдары, «Стекло Сервис», «Казармапром», «ТМК-Каз­трубпром», «Аяз», «Квант» жауап­­­к­ершілігі шектеулі серік­тес­тік­­­тері де өз қызмет­керлерінің жа­л­а­қы­­­сын өсіріп, табыс пен тұрмыс са­­па­­рын арттыруға ден қой­ған. Бұл атал­ған кәсіп­орындарда 2019 жыл­дың 1 қаң­тарынан бастап жала­қы көте­рі­­ліп, ең төменгі жа­лақы мөл­шері 60 мың теңгеден жоғары болмақ.

– Жаңа жылдан бастап «Квант» ЖШС-дағы ең төменгі жалақы мөлшері 61 мың теңге болады. Біз мемлекеттік қолдау арқылы кор­пус­ты жиһаз жасайтын жаңа фабрика ашып отырмыз. Цехтары­мыз ең заманауи жабдық санала­тын германдық «Hомаg», италия­лық «Griggiо» құралдарымен жарақтанған, – дейді кәсіпорын басшысы Дмитрий Пшеничный.

Оралда жүн өңдеп, пима, киіз секілді түрлі бұйым шығаратын «Аяз» компаниясы ең көне өндіріс орындарының қатарында. Қыс жақындап, күн суытқанда «Аяздың» өніміне сұраныс та артады. Айта кетейік, «Аяз» кәсіпорны бүгінде металл «сүйекті» киіз үй, жорық лашықтары, сауда қатарлары, мұнай-газ, агросектор, төтеншеліктер, т.б. сала қызметкерлері үшін арнайы киімдер шығарып, көпшілік көңі­лінен шығып жүр.

– Біз халықтың әл-ауқатын арттыру туралы Елбасы бастамасын толығымен қолдаймыз. Өз тарапымыздан бүгінде 38 мың теңге жалақы алып жүрген 26 қызметкеріміздің айлық табысын 60 мың теңгеге көтеруге шешім қабылдап отырмыз. Көріп отырғандай, жалақы екі есеге жуық көтерілмек, – дейді компания директоры Амангелді Ермекқалиев.

Қазбек ҚҰТТЫМҰРАТҰЛЫ,

«Егемен Қазақстан»