«Асылып қалған»: Өмір бойына сотталған лаңкес түрмеде көз жұмды — Қазақстан жаңалықтары

Ақтөбеде әскери бөлімге шабуыл жасаған лаңкес өзіне қол салды. Өмір бойына сотталған 34 жастағы Асхат Иманғалиев түрмеде асылып қалған, деп хабарлайды Stan.kz ақпарат агенттігі КТК арнасына сілтеп.

Ол осыдан  төрт жыл бұрын жат ағымның жетегінде кеткен жігіттермен 6655 әскери бөлімі мен қару-жарақ сататын дүкенге шабуыл жасаған. Сол кезде жеті бейбіт тұрғын қаза тауып, қырыққа жуық адам жарақат алды.

Алты күнге созылған арнайы операция барысында оқиғаға қатысы бар делінген 18 адамның көзі жойылып, бірнеше адам ұсталған. Ақтөбедегі қарулы шабуылға қатысқан 29 адамның жетеуі сот үкімімен өмір бойына түрмеге қамалған болатын. Өзге айыпталушылар екі жылдан 22 жылға сотталып, «қылмысты жасырып қалған» бір адамның төрт жылға бостандығы шектелді.

Өмір бойы түрмеге қамалған жеті лаңкестің бірі былтыр туберкулез дертінен қаза тапса, екіншісі – Асхат Иманғалиев Арқалықтағы түрмеде өзіне қол салды. Ол тірі кезінде берген сұхбатында азғырушыларының «тірідей қолға түскенше, өлген артық» деп үгіттегенін айтқан болатын.