Арыстанбек Мұхамедиұлының әйелі мен адвокаты да сотталатын болды

Арыстанбек Мұхамедиұлының ісіне қатысты тың деректер пайда болды. Астаналық сот экс-министр және Ұлттық музейдің бұрынғы директорының әйелі парақорлыққа делдал болды деген айып тақты. Бұл туралы Kznews.kz ақпарат агенттігі Zakon.kz басылымына сілтеме жасап хабарлайды.

Кеше Астана қаласының қылмыстық істер бойынша ауданаралық маманданған сотында экс-министр Арыстанбек Мұхамедиұлы, оның жұбайы мен адвокатына қатысты сот ісі басталды.

«Мұхамедиұлына аса ірі көлемде пара беруге оқталды деген (ҚК 24-бабы), ал адвокатқа аса ірі мөлшерде алаяқтық жасады деген (ҚК 190-бап, 4-бөлігі, 2-тармағы) айып тағылды», делінген сот мәлімдемесінде.

Сонымен қатар, Мұхамедиұлының жұбайы қылмыстық кодекстің  368-бабы, 1-бөлігі бойынша парақорлыққа делдал болды деп айыпталды.

Бір жылдан аса уақыт тергелген Арыстанбек Мұхамедиұлы сот үкімімен 8 жылға бас бостандығынан айырылған еді. Арыстанбек Мұхамедиұлына Қылмыстық кодекстің 28-бабы 3-бөлігі (қылмысты ұйымдастыру) және 189-бабының 4-бөлігінің 2-тармағы (заңсыз иелену немесе талан-таражға салу, яғни сеніп тапсырылған бөтеннің мүлкін аса ірі көлемде жымқыру) бойынша айып тағылған.

Сондай-ақ ол өзімен қатар айыпталғандарға қатысты «өмірін мен үшін түрмеде өткізгенін қаламаймын» деп мәлімдеді.

KZNews.kz