Арман Шораевқа қатысты қылмыстық іс тоқтатылды — Қазақстан жаңалықтары

Қазақстанның ішкі істер министрлігі Қоғамдық сенім ұлттық кеңесінің бұрынғы мүшесі, азаматтық белсенді Арман Шораевқа қатысты қылмыстық істі тоқтатты,  деп хабарлайды Stan.kz ақпарат агенттігі.

Бұл туралы белсендінің қорғаушысы Жохар Өтебеков Facebook-тегі парақшасында жазды.

«ІІМ тергеушісі қылмыстық құқық бұзушылық құрамының болмауына байланысты Арман Шораевқа қатысты жалған ақпарат тарату туралы қылмыстық істі тоқтатты. Бұл жаңа ғана болды», — деп хабарлады адвокат.

Жохар Өтебеков журналист және белсенді Арман Шораевқа қолдау көрсеткен қазақстандықтарға алғысын білдірді.

«Мен саяси келіспеушіліктерді жеңіп,  бізді қолдаған адамдарға ерекше ризамын. Сіздер адам құқығын қорғауда даналық пен бірлікті көрсеттіңіздер. Журналистер мен қоғам қайраткерлеріне қатысты Қылмыстық кодекстің 274-бабы (Көрінеу жалған ақпарат тарату) бойынша барлық қылмыстық істердің тоқтатылуына үміттенеміз», — деп толықтырды ол.

Сонымен қатар, елге танымал заңгер билік органдарына Қылмыстық кодекстің 274-бабын ізгілендіру және жазаны жеңілдету үшін екі жылдық жолды жалғастыру қажет деп атап өтті.

«274-ті өзгерту керек, оны Қылмыстық кодекстен алып тастау керек. Жаңа Қазақстанда ақпарат таратқаны үшін адамдар түрмеге түспеуі керек», — деді Өтебеков.