15,5 млн теңге: Нұр-Сұлтандағы ауданның экс-әкіміне соңғы үлгідегі iPhone алғаны үшін айыппұл салды — Қазақстан жаңалықтары

Нұр-Сұлтандағы «Байқоңыр» ауданының экс-әкімі Асқар Есіловке соңғы үлгідегі iPhone смартфоны түрінде пара алғаны үшін 15,5 миллион теңге айыппұл салынды, деп хабарлайды Stan.kz ақпарат агенттігі.

«Нұр-Сұлтан қаласының Байқоңыр ауданының бұрынғы әкімі А.Есілов 515 000 теңге көлемінде ұялы телефон түрінде пара алғаны және футбол алаңдарының құрылысы бойынша қосалқы мердігерлік жұмыстарды жүргізуге көмектескені, сондай-ақ кәсіпкер С.Нұртазинге пара бергені үшін кінәлі деп танылды», — делінген Есіл ауданының №2 аудандық сотының хабарламасында.

Тергеу кезінде Есілов өз кінәсін толық мойындаған. Аталған фактіні сотта да растады.

Сот отырысы барысында прокурор  Есіловке 15 450 000 теңге (41 000 АҚШ доллары), ал Нұртазинге 7 725 000 теңге (20 500 доллар) көлемінде айыппұл тағайындауды сұрады.

Айыппұл төлеуден қасақана жалтарған жағдайда, жазаның бұл түрі бас бостандығынан айыруға ауыстырылуы мүмкін. Үкім заңды күшіне енген жоқ.

Бұдан басқа,  сотталушылар өмір бойы мемлекеттік қызметте жұмыс істеу құқығынан айырылған.