Атырауда бүтін бір отбасының жоғалуы мен ерлі-зайыптының қазасына қатысты іс бойынша күдікті ретінде аталған Сұлтан Сәрсемалиевтің анасы журналистке сұхбат бергені айтылды, деп хабарлайды kznews.kz тілшісі turkystan.kz-ке сілтеме беріп.
Журналист Жанат Жақсыбайқызының жазуынша, ол сұхбатты әзірге жариялауға асықпай отыр. Тілші іссапар барысында күдіктінің әйелімен бірге Атырау қаласында жалдап тұрған «қоржын үйге» барып, сол маңнан қосымша дерек іздеген.
Оның айтуынша, үйдің екінші бөлігін басқа отбасы жалдап тұрады екен, алайда көршілер есік ашпаған. Журналист «күдікті Сұлтан Сәрсемалиев пен әйелі Ақбаян Мұқанғалиева бұл үйді бір жылдан астам уақыт жалдап тұрған» деген мәліметті келтіреді. Сондай-ақ 2025 жылғы 5 қараша күні Жангелдин ауылынан Мейрамгүл Қарабалиеваны алып шыққан қыз бен күйеу осы мекенжайға келген болуы мүмкін деген болжам барын жазды.
Тілшінің жазбасында жоғалған Наурыздың да осы үйде болғаны айтылады. Ол күйеу баласы жұмыста жүргенде қарындасына қарап, көмектескен деген дерек келтірілген. Журналисттің сөзіне сүйенсек, Наурызды туыстары соңғы рет 2025 жылдың мамырында көрген.
Жанат Жақсыбайқызы соңғы күндері біреулердің жұмыс телефонына дамыл бермей хабарласып жатқанын да меңзеген. Айтуынша, оларды күдіктінің анасы айтқан сөздер қатты қызықтырған, бірақ сұхбат бәрібір кейін жарияланбақ. «Дайын асқа, тік қасық» болып күтіп отырған түрлі сайттар мен каналдар бар» деп, ол ақпарат қуғандардың көбейгеніне қынжылыс білдірген.
Іздеу жұмыстарына қатысты да дерек айтылды: журналист полиция үш күннен бері дәл осы жалдамалы үйдің айналасын қазып, георадармен тексеріп жатқанын жазады. Оның болжамынша, жоғалған қыз осы маңнан табылып қалуы мүмкін. Тілші Атырау қаласындағы Геолог ықшам ауданын «қорқынышты жер» деп сипаттаған.
"Ол – тәртіпті, жуас бала": Атыраудағы сұмдық істе күдіктінің анасы ұлын ақтап отыр
Журналист келтірген мәліметте отбасында 5 бала бар екені, ең кішісі 1 жаста, үлкені 10 жаста екені айтылады. Үлкен ұлдарының әке-шешесін іздеп жүргені де жазбада назарға алынған. Бұл деталь оқиғаның адам тағдырына тікелей әсер етіп жатқанын көрсетеді.
Сондай-ақ журналист ресми мәлімдемелерге қатысты күмәнін білдірген. Ол полицияның күдіктінің аты-жөнін «бүгін ғана ресми жариялағанын» атап өтеді. Бұған қоса, Ақбаян Мұқанғалиеваның психдиспансерде есепте тұратыны жөнінде денсаулық сақтау басқармасынан мәлімет алғанын айтып, бұған дейін «еш жерде есепте жоқ» деген ақпаратпен қабыспайтынын сынаған.
