25 желтоқсан, 2018
Белгілі спорт журналисі, «Құрмет» орденінің иегері Оңдасын Елубайдың «Дүниені дүбірлеткен жеті дода» атты кітабы жарық көрді.
Өскеменде тұсауы кесілген еңбекте автор 2000 жылы өткен Сидней Олимпиадасынан бастап, Афины, Турин, Бейжің, Лондон, Сочи және биылғы Пеңчаңда болған жеті додада көрген-түйгенін жазып, аталған Олимпиадаларда өзі түсірген 500-ден аса фотосуретті топтастырған.
«Дүниені дүбірлеткен жеті дода» қазақ баспасөзі қара шаңырағының бірі – «Қазақ спорты» газетінің 60 жылдығына арналып отыр. Жинақта еліміздегі спорт саңлақтарының соңғы жеті Олимпиадада қол жеткізген табысы ғана емес, кемшілігі де сөз етіледі.
Автор Сидней Олимпиадасында бокстан қазақ жастары арасынан тұңғыш Олимпиада чемпионы атанған Бекзат Саттархановты да еске алуды ұмытпайды. Сондай-ақ жарыс болған елдердің әдет-ғұрпы, салт-санасы, табиғаты мен тарихын да таразылай кетеді.
Кітапқа алғысөз жазған – республикалық «Қазақ спорты» газетінің бас редакторы Дүрәлі Дүйсебай. Ол «Кітапты оқи отырып Оңдасынмен бірге құдды бір осы жарыстардың басы-қасында өзің жүргендей сезінесің. Жинақ осынысымен де құнды», – деп баға береді.
Жансая ҚАМБАР
