Қазақстанда жеңілдетілген декларация негізіндегі арнайы салық режимін қолданатын бизнестің табысы бір жылда 18,9%-ға өскен. Бұл 2026 жылдың бірінші жартыжылдығының қорытындысы бойынша белгілі болды, деп хабарлайды kznews.kz.
Биыл қаңтардан бастап Қазақстанда жаңа Салық кодексі күшіне енді. Құжат аясында арнайы салық режимдері оңтайландырылды. Соның ішінде жеңілдетілген декларация негізіндегі режим кәсіпкерлер арасында кең қолданылатын тетіктердің біріне айналды.
Алғашқы есепті кезеңнің нәтижесіне сәйкес, осы режимді қолданатын бизнестің табысы 9,4 трлн теңгеге жетті.
Салыстыру үшін, 2025 жылдың бірінші жартыжылдығында бұл көрсеткіш 7,9 трлн теңге болған. Осылайша, бір жыл ішінде бизнестің декларацияланған табысы 1,5 трлн теңгеге, яғни 18,9%-ға артқан.
Жаңа салық режимінің алғашқы нәтижелері жұмыспен қамту көрсеткіштерінен де көрінеді. Жеңілдетілген декларация негізіндегі режимді қолданатын кәсіпкерлердегі жалдамалы қызметкерлер саны 14,2%-ға өскен. Олардың саны 445 мыңнан 509 мың адамға дейін жеткен.
Сонымен қатар осы бизнестің еңбекақы қоры 7,2%-ға ұлғайған.
Тағы бір өзгеріс – жалдамалы жұмыскерлері жоқ бизнес субъектілерінің саны 30,5%-ға азайған. Ал декларациясында табысын нөлден 5 млн теңгеге дейін көрсеткен кәсіпкерлердің үлесі үштен бірге төмендеген.
Бұл деректер кәсіпкерлердің жаңа салық режимі бойынша алғашқы рет бірінші жартыжылдыққа декларация тапсыруының қорытындысы негізінде алынған. Кәсіпкерлер тиісті есептілікті тамыз айында тапсырған.
Жеңілдетілген режимді кімдер қолдана алады?
Жеңілдетілген декларация негізіндегі арнайы салық режимін Салық кодексінде белгіленген талаптарға сәйкес келетін дара кәсіпкерлер мен заңды тұлғалар пайдалана алады.
Бұл режим бойынша жылдық табыс 600 мың АЕК-тен аспауы тиіс.
Жеке немесе корпоративтік табыс салығының мөлшерлемесі 4% болып белгіленген. Сонымен бірге жергілікті өкілді органдар заңда белгіленген шекті деңгей аясында бұл мөлшерлемені төмендетуге немесе арттыруға құқылы.
Салық және есепті кезең ретінде жарты жыл белгіленген.
Жеңілдетілген режимді қолданатын кәсіпкерлер импортталатын тауарларға және бейрезиденттерге байланысты ҚҚС-ты қоспағанда, ҚҚС пен әлеуметтік салық төлеушілері болып саналмайды.
Алғашқы нәтижелер бизнес кірістерінің және жұмыспен қамтудың өскенін көрсетіп отыр. Дегенмен жаңа режимнің ұзақ мерзімді әсерін бағалау үшін кейінгі есепті кезеңдердің нәтижелерін де қарау қажет.