9 маусым, 2021
Былтыр наурыз бен мамыр аралығында Алматыда 160 медицина қызметкері жұмыста жүріп коронавирус жұқтырған.
Бұл туралы Алматы қаласының санитарлық-эпидемиологиялық департаментінің басшысы Жандарбек Бекшин сотта хабардар етті.
«СҚ Фармацияның» бұрынғы басшысы Берік Шәріптің ісіне қатысты сот тергеуіне куәгер ретінде тартылған ол Алматыдағы орталық клиникалық ауруханада вирустың таралуына қатысты түсініктеме берді. Былтыр инфекцияның жаппай таралуына бірнеше жайт себеп болған. Қорғаныш киімінің жетіспеуінен бөлек, оларды кию тәртібі бұзылған, ауруханадағы оқшаулау жүйесіз жүргізілген. Қабылданатын науқастар ағымы да дұрыс реттелмеген.
«СҚ Фармация» компаниясының бұрынғы басшысы Берік Шәріп лауазымдық өкілеттігін асыра пайдалану бойынша сотқа тартылған еді. Яғни, компания қорғаныш киімін уақытылы жеткізбегендіктен, медицина қызметкерлері жаппай ауруға шалдықты деген айып тағылған.
Берік Шәріпке қаруды заңсыз иемдену мен сақтау бабы бойынша да айып тағылып отыр.
