Бүгін, 19:43
Өскемендегі «Қазмырыш» кәсіпорнында болған апаттан кейін қала әкімі Алмат Ақышовқа қатысты сотқа талап арыз берілді. Жергілікті заңгер Алексей Божков төтенше жағдай кезінде тұрғындарға дер кезінде ескерту жасалмағанын айтып, әкімдіктің әрекетсіздігін заңсыз деп тануды талап етуде. Кейін белгілі болғандай, апат салдарынан атмосфераға 2,8 тонна мырыш шаңы тараған, деп хабарлайды kznews.kz.
2026 жылғы 5 мамыр күні таңертең Өскемен тұрғындары қала аспанында алып шаң бұлтын байқаған. Алайда сол сәтте қалада нақты не болғаны, сыртқа шығудың қаншалықты қауіпсіз екені немесе ауаның ластану деңгейі туралы ресми ақпарат жарияланбаған. Тұрғындар оқиға жайлы мәліметті тек әлеуметтік желілер арқылы білген.
Екі айдан кейін ғана апат салдарынан атмосфераға 2,8 тонна мырыш шаңы тарағаны белгілі болды. Осыдан кейін жергілікті заңгер Алексей Божков Өскемен қаласының әкімі Алмат Ақышовты әрекетсіздігі үшін сотқа берді. Бұл туралы Ulysmedia порталы хабарлады.
«Не істеу керектігін ешкім айтпады»
Заңгердің айтуынша, ірі өндірістік нысанда жарылыс болған кезде мемлекеттік органдар тұрғындарға қауіпсіздік шаралары туралы жедел ақпарат беруге міндетті болған.
«Кәсіпорында жарылыс болды, бірақ одан кейін мемлекеттік органдар үнсіз қалды. Біз болған оқиға туралы әлеуметтік желіден білдік. Ал нақты мәліметтер түске қарай ғана журналистердің чаттарынан тарай бастады.
Сол уақытқа дейін білім бөліміне, экология департаментіне, әкімдікке және басқа да мекемелерге қайта-қайта хабарласып, тұрғындарға не істеу керектігін сұрадық. Қаладан кету керек пе, үйде қалу керек пе, қорғаныс құралдарын пайдалану қажет пе, балаларды мектепке жіберуге бола ма – ешкім нақты жауап берген жоқ. Мен қауіпсіздік үшін баламды мектепке жібермедім», – дейді Алексей Божков.
Бұл алғашқы сот емес
Бұл Алексей Божковтың әкімдікке қарсы бірінші талабы емес. Бұған дейін ол Өскеменде ауадағы тұз қышқылының (хлорсутектің) мөлшері шекті деңгейден бірнеше есе асып кеткен кезде де тұрғындарға уақытылы ескерту жасалмағаны үшін сотқа жүгінген.
Ол кезде қаланы Жақсылық Омар басқарған. Кейін ол алаяқтық және жемқорлық қылмыстары бойынша сотталып, жазаға тартылған.
Заңгердің пікірінше, сол оқиғадан кейін жергілікті билік қажетті қорытынды шығармағандықтан, тұрғындарды төтенше жағдайлар туралы дер кезінде хабардар ету мәселесі әлі күнге дейін шешілмей отыр.
