Бүгін, 11:24
Еліміздің шекарасында жанар-жағармайды заңсыз шығаруға бағытталған жүздеген әрекеттің жолы кесілді.
Ұлттық қауіпсіздік комитетінің мәліметінше, 1-10 тамыз аралығында шекара арқылы тауарлар мен жүктерді заңсыз өткізуге қатысты 551 дерек анықталған. Олардың жалпы құны 1 млрд теңгеден асады.
Соның ішінде 411 жағдайда жанар-жағармай материалдарын заңсыз алып шығуға жол берілмеген. Тағы 140 дерек халық тұтынатын тауарларды шекарадан өткізу тәртібін бұзуға қатысты.
Заң бұзған азаматтар қолданыстағы заңнамаға сәйкес жауапкершілікке тартылды. ҰҚК шекара бекеттеріндегі бақылау жұмыстары жалғасатынын хабарлады.
Жалпы, Жанар-жағармайдың шетелге заңсыз шығарылуы Қазақстан үшін жаңа мәселе емес. Бұған дейін де елдегі салыстырмалы түрде арзан бензин мен дизель отынының көрші мемлекеттерге заңсыз әкетілуі бірнеше рет көтерілген болатын.
Қаржы мониторингі агенттігінің дерегіне сәйкес, жыл басынан бері сұйық отынның шекара арқылы заңсыз айналымына қатысты 21 қылмыстық іс қозғалған.
Ал қазіргі көрсеткіштер жанармайдың заңсыз шығарылуы әлі де шекарадағы өзекті мәселелердің бірі екенін көрсетеді.
