4 желтоқсан, 2025
Оқу-ағарту министрі Жұлдыз Сүлейменова Мәжіліс кулуарында мұғалімдерді аттестациялау жүйесіне енгізілетін өзгерістер туралы маңызды мәлімдеме жасады, деп хабарлайды kznews.kz.
Министрдің сөзінше, қазір аттестациялау тәртібін жаңарту туралы бұйрық жобасы Орта білім комитетімен бірге талқыланып жатыр. Құжат әзірге бекітілмеген.
"Егер бұйрық қабылданса, өзгерістер тек келесі оқу жылынан бастап қолданысқа енгізіледі", – деді Жұлдыз Сүлейменова.
Ол бұл жұмысқа педагогикалық қауымдастықтың белсенді түрде ұсыныс жолдап отырғанын да атап өтті.
"Білікті әрі тәжірибелі мұғалімдер авторлық бағдарламаларды алып тастау мәселесін қоса алғанда, түрлі ұсыныстарын жіберіп жатыр. Барлық ұсынысты жан-жақты қарап, талдап отырмыз. Бұған дейін "педагог-мастер" және "педагог-зерттеуші" санаттарына қатысты шешім қабылданғанын білемін, мұғалімдер арасында белгілі бір наразылық болғанын да түсінемін. Қазір жаңа аттестациялау тетіктерін барынша ашық әрі әділ ету бағытында жұмыс жүргізіп жатырмыз", – деді министр.
