Бүгін, 18:32
Лондонның «Челси» клубының бас бапкері Хаби Алонсо қазақстандық шабуылшы Дастан Сәтпаевтың өнеріне қатысты пікір білдірді. Бұл туралы маман австралиялық «Вестерн Сидней Уондерерс» командасына қарсы өткен жолдастық кездесуден кейінгі баспасөз мәслихатында айтты, деп хабарлайды kznews.kz.
6:4 есебімен аяқталған матчта Дастан Сәтпаев ойынның алтыншы минутында есеп ашып, «Челси» сапындағы алғашқы голын соқты. Кездесуде сондай-ақ Дариу Эссугу, Джейми Гиттенс және хет-трик авторы Жоау Педру мергендігімен көзге түсті.
Матчтан кейін журналистер Хаби Алонсодан 17 жастағы қазақстандық шабуылшының ойыны мен келесі маусымдағы мүмкіндігі туралы сұрады. Бапкердің айтуынша, маусым алдындағы дайындық кезеңі аяқталмайынша құрамға қатысты нақты шешім қабылданбайды.
«Алдымызда көптеген мәселе бар. Біз өткен маусымда командада болмаған футболшыларды бақылауға мүмкіндік алып отырмыз. Сондықтан бірінші ресми ойынға дейінгі құрам туралы айтуға әлі ерте», – деді Алонсо.
Сонымен қатар испаниялық маман Дастан Сәтпаевтың ойын ерекшелігіне де тоқталды.
«Мен Дастанды өткен жылдан бері, Алматыдан білемін. Оның ерекше ойыншы екені байқалады. Ол қарсылас қақпасына қауіп төндіре алады, шабуылда кеңістікті өте жақсы пайдаланады және қапталдан орталық шабуылшыға жақындай отырып тиімді әрекет етеді. Бұл – оның клубтағы алғашқы тәжірибесі, әрі өзін жақсы қырынан көрсетті», – деді «Челси» бапкері.
Сәтпаевтың Англия Премьер-лигасының деңгейіне физикалық тұрғыда дайын екені туралы сұраққа Алонсо қысқа ғана жауап берді.
«Ол өте мықты әрі өте жылдам. Сіздер оған шынымен тәнті боласыздар», – деді испаниялық маман.
17 жастағы Дастан Сәтпаевтың «Челси» сапындағы сәтті дебюті қазақстандық жанкүйерлердің үлкен қызығушылығын тудырды. Енді футболшының жаңа маусымда негізгі құрамнан орын ала ма, жоқ па деген сұраққа жауап маусым алдындағы дайындық аяқталғаннан кейін белгілі болады.
