Бүгін, 18:14
Алматыда 18 жастағы қыздың үстіне ағаш құлап, ол ауыр жағдайда ауруханаға жеткізілді. Оқиға 27 маусым күні болған, деп хабарлайды kznews.kz.
Дәрігерлердің мәліметінше, Селина Абитова №4 қалалық клиникалық ауруханасына аса ауыр халде жеткізіліп, бірден анестезиология, жансақтау және қарқынды терапия бөліміне жатқызылған. Қазіргі уақытта науқас өкпені жасанды желдету аппаратына қосылған, жағдайы өте ауыр деп бағалануда.
Қыздың жақындары әлеуметтік желілер арқылы қазақстандықтардан көмек сұрап, IV (төртінші) оң қан тобының донорларын іздеп жатыр.
Сонымен қатар, аурухана әкімшілігі пациентке қажетті медициналық көмек толық көлемде көрсетіліп жатқанын хабарлады. Дәрігерлер оған екі рет гемотрансфузия – қан және оның компоненттерін құю процедурасын жүргізген. Медициналық мекеме қазіргі таңда қан қоры жеткілікті екенін, емдеу процесі үздіксіз жалғасып жатқанын мәлімдеді.
Науқастың өмірі үшін дәрігерлер күресіп жатыр.
