4 қаңтар, 2026
Танымал әнші Айша Байбосынова әлеуметтік желіде қуанышты жаңалығын бөлісіп, жас ана атанғанын хабарлады, деп жазады kznews.kz.
Өнер иесінің айтуынша, 26 желтоқсанда шекесі торсықтай ұл бала дүниеге келген.
"Аллаға шүкір, сабырмен күткенге берілетін сый ерекше екен. Бұл сәби – өміріме келген үлкен аманат, маңдайыма жазылған ең тәтті бақ", – деп жазды ол.
Айша Байбосынова ұлының кіндік әке-шешесі продюсер Тұрсын Алагөзов пен Баян Алагөзова екенін атап өтті. Сәбиге азан шақырып Тұрсынғали есімі қойылған.
"Балапанымның кіндік әке-шешесі – өмір мен өнер жолында жанымыздан табылған жақын достарымыз Тұрсен мен Баяша. Тұрсынғали есімі – тағдыр тоғыстырған сыйлы жандарға деген құрметіміздің, жылдар бойы бекіген достық пен сенімнің белгісі", – деп жазды әнші.
Желі қолданушылары жас анаға құттықтау жаудырып, сәбиге ақ тілектерін арнауда.
