70 келіге дейінгі салмақта бәсекеге түскен қазақстандық боксшы, әлем чемпионы Төрехан Сабырхан Азия чемпионатының жартылай финалында Қытай өкілі Пэйчэн Ванды жеңді, деп хабарлайды kznews.kz.
Төрехан Сабырхан бірінші раундта-ақ қарсыласын жойқын нокдаунға жіберді. Ал екінші раундта тағы екі мәрте нокдаунға түсірді. Нәтижесінде төреші қытайлық боксшыға нокаут санап, жекпе-жекті мерзімінен бұрын тоқтатты.
Еске салайық, бүгін чемпионаттың таңғы сессиясында Төреханның ағасы Махмұд Сабырхан күтпеген жерден моңғолиялық Хархүү Билгуунсайханға есе жіберіп, қола жүлдемен шектелді. Сондай-ақ Қазақстан құрамасының тағы бір өкілі Ертуған Зейнуллинов та қола медаль иеленді.
Төрехан Сабырханнан бөлек финалға Бақыт Сейдіш, Надежда Рябец және Дина Исламбекова жолдама алды.