Президент Қасым-Жомарт Тоқаев жаңа Қорғаныс министріне бюджет қаражатын тиімді пайдалану және армиядағы реформаларды жеделдету жөнінде бірқатар тапсырма берді, деп хабарлайды kznews.kz.
Оның айтуынша, қаражатты мақсатсыз жұмсауға және ұрлыққа жол берілмеуі керек. Мұндай әрекеттерге жол бергендер жауапкершіліктен қашпайды.
Қауіпсіздік Кеңесінің Аппаратына Қорғаныс министрлігімен бірлесіп, он күн ішінде әскери реформаның жоспарын әзірлеу тапсырылды. Құжат қазан айының екінші жартысында Қауіпсіздік Кеңесінің отырысында қаралады.
Президент әскери қызметтегі командалық лауазымдарға тағайындау кезінде жеке адалдық емес, тәжірибе мен кәсіби біліктілік басты өлшем болуы керектігін айтты.
Сонымен қатар Қасым-Жомарт Тоқаев әскери қызметшілердің қауіпсіздігі мен өмірі армиядағы басты басымдық болуы тиіс екенін атап өтті. Оның пікірінше, әскери қызмет жастарға отансүйгіштік пен жауапкершілік құндылықтарын қалыптастыратын орта болуы қажет.
Армияны реформалау жұмыстарын Қауіпсіздік Кеңесінің Аппараты үйлестіреді.