Бүгін, 09:42
Әлеуметтік желіде Ақтаудағы бұрынғы президент резиденциясының аумағында орналасқан ерекше моншаның суреттері тарады. Желі қолданушылары Каспий теңізінің жағасындағы бұл нысанды Нұрсұлтан Назарбаев пайдаланған болуы мүмкін деп болжап отыр, деп хабарлайды Ulysmedia.kz.
Жарияланған кадрлардан пирстің үстіне салынған, сыртқы пішіні кемеге ұқсайтын нысанды көруге болады. Барлығы он шақты сурет тараған.
Фотоларда моншаның ішкі көрінісі де көрсетілген. Бу бөлмесінің қабырғалары ағашпен қапталған, ал терезелері кеме иллюминаторын еске түсіреді. Сонымен қатар ішінде баспалдақтар, металл тұтқалар және кафель төселген жеке бөлме бар.
Ақтаулықтардың бірқатары бұл жерді бірден танып, оның бұрынғы президент резиденциясының аумағында орналасқанын жазған. Осыдан кейін әлеуметтік желіде нысанға "Назарбаевтың моншасы" деген атау беріліп кеткен.
Ақпараттың қаншалықты рас екенін анықтау үшін аумақ дрон арқылы түсірілген. Әуеден түсірілген кадрларда Каспий теңізінің жағалауындағы шығанақ пен теңізге қарай созылған пирс анық көрінеді.
Пирстің үстінен әлеуметтік желіде тараған фотолардағы ерекше ғимаратқа ұқсас нысан да байқалған. Осылайша, желіде жарияланған моншаның шынымен бұрынғы президент резиденциясының аумағында орналасқаны расталған.
Алайда бұл нысанды Нұрсұлтан Назарбаевтың жеке өзі пайдаланғаны туралы ресми дерек әзірге жарияланған жоқ. Сондықтан оның "Назарбаевтың моншасы" деген атауы әлеуметтік желі қолданушыларының болжамына негізделген.
