15 сәуір күні Шымкент қаласында FlyArystan әуе компаниясының ұшағы қону кезінде итті қағып кеткен. Оқиға Алматы – Шымкент бағыты бойынша ұшқан FS7105 рейсімен болған, деп хабарлайды kznews.kz.
Tengrinews.kz жазуынша, ұшақ қону жолағында келе жатқан кезде жануармен соқтығысқан.
"2026 жылғы 15 сәуірде Алматы – Шымкент бағыты бойынша ұшқан FS7105 рейсі қонғаннан кейін, Шымкент әуежайының ұшу-қону жолағында әуе кемесі жануармен (итпен) соқтығысты", – деп хабарлады тасымалдаушының баспасөз қызметі.
Компанияның мәліметіне сәйкес, соқтығу салдарынан ұшақтың кейбір бөлшектері зақымданған.
"Соқтығу нәтижесінде әуе кемесінің құрамдас бөліктері бүлінді. Қазіргі уақытта ауыстыруды қажет ететін бөлшектер Алматыдан жеткізіледі", – деп нақтылады FlyArystan өкілдері.
Қандай нақты бөлшектер зақымданғаны әзірге айтылған жоқ. Оқиғаға байланысты тексеру жүргізіліп жатыр.
Бұл жағдай Шымкент станциясындағы көліктегі полиция басқармасында тіркелген. Қазіргі уақытта оқиғаның барлық мән-жайы анықталуда. Әзірге жануардың ұшу-қону жолағына қалай шыққаны белгісіз.