5 желтоқсан, 2025
«Қойшы бала» лақап атымен танылған танымал әнші Айдос Кәден өз өмірінде орын алған ауыр кезеңдердің бірін еске алып, аяқтан шалудың салдарынан сотталып кете жаздағанын айтып берді, деп хабарлайды kznews.kz.
Әнші сұхбатында сол оқиғаның мән-жайын нақты ашып бермегенімен, тұспалмен жеткізуді жөн көрген. Оның айтуынша, желіде тараған бір видео оған біраз қиындық туғызып, жазаға тартыла жаздаған.
«Екі жылға сотталып кете жаздадым. Аяқтан шалды. Видеоның кесірі болды. Алайда өзімді өзім ақтап шықтым. Өзімнің ақ екенімді дәлелдей алдым. Адвокат жалдауға ақша керек болды. Білесіздер ғой. Ашып айтатын зат емес», – деп қысқа қайырды Айдос.
Ол сонымен бірге шығармашылық жолындағы тағы бір өкінетін тұсын атап өтті. Айдос бұрынғы продюсері Жігер Ауыпбаевпен кәсіби байланысын үзгенін қате шешім деп қабылдайтынын жасырмады. Әнші сол кезде өзіне теріс әсер еткен адамдардың сөзіне сеніп қалғанына өкінетінін жеткізді.
