Ақмола облысының әкімдігі Щучинск қаласында болған оқиғаға қатысты жаңа деректерді жариялады. Онда бес қабатты тұрғын үйге жапсарлас салынған бір қабатты кафеде газ-ауа қоспасының жарылысынан қаза тапқандар саны жеті адамға жетті, деп хабарлайды kznews.kz.
– Жедел деректерге сүйенсек, барлығы 26 адам зардап шекті, оның ішінде 7 адам қаза тапты (марқұмдардың арасында 16 жастағы қыз бар). 13 адам Бурабай аудандық ауруханасында жатыр. 6 адам амбулаториялық бақылауға жіберілді, – делінген хабарламада.
Сондай-ақ денсаулық сақтау басқармасы желісі бойынша қосымша медициналық бригадалар жедел түрде жасақталған.
– Барлық қажетті ресурстар жұмылдырылды: мамандар, дәрі-дәрмек, санитарлық авиация оқиға орнына жіберілді. Облыстық жедел штаб жұмыс істеп жатыр. Оқиғаның себептері анықталып жатыр. Ақмола облысының әкімдігі қаза тапқандардың отбасыларына, сондай-ақ зардап шеккендерге барлық қажетті көмекті көрсетеді, – делінген әкімдік ақпаратында.
Дәрігерлердің айтуынша, зардап шеккендердің алған жарақаттарының негізгі сипаты – зақымдану аумағы мен тереңдігі әртүрлі болатын термиялық күйіктер. Барлық пациенттердің жағдайы тұрақты бақылауда.