Бүгін, 15:00
Чилидің астанасы Сантьяго маңында сұйытылған газ тасымалдаған жүк көлігі жол апатына түсіп, артынша жарылыс пен ірі өртке ұласқан. Ресми мәлімет бойынша, 4 адам қаза тауып, 17 адам жарақат алған. Оқиға 19 ақпан күні таңертең ірі тасжол бойында болған, деп хабарлайды kznews.kz.
Алдын ала деректерге сүйенсек, соқтығысудан кейін газ сыртқа шығып, ауаны қою бұлттай тұмшалап кеткен. Көп ұзамай от тұтанып, күшті жарылыс болып, жалын айналаны шарпыған.
Оқиға орнына құтқарушылар мен өрт сөндірушілер жедел жетіп, аумақты қоршауға алған. Жараланғандардың бірқатары ауыр жағдайда екені айтылады.
Жарылыстың салдарынан маңайындағы 50-ден аса көлік зақымданған. Қазір оқиғаның нақты себебі анықталып жатыр, болжамдардың бірі ретінде жылдамдықты асыру ықтималдығы да қарастырылуда.
