Бүгін, 13:02
Астанада өткен референдум күні ерекше әрі әсерлі сәттердің бірі қаладағы сайлау учаскелерінің бірінде болды. Дауыс беруге келген жас жігіт көпшіліктің көзінше сүйіктісіне сезімін білдіріп, оған үйлену туралы ұсыныс жасады, деп хабарлайды kznews.kz.
Жігіт бұл сәтке алдын ала дайындалған. Ол сүйіктісін референдум учаскесінің алдында күтіп алып, халықтың алдында тізерлеп тұрып, қолына сақина ұсынып, өмірін бірге өткізуге шақырған.
Күтпеген ұсынысқа толқыған бойжеткен жігіттің ұсынысын қабыл алған. Бұл көрініске куә болған қала тұрғындары жас жұпты қолдап, қуаныштарын бөлісіп, оларға ақжарма тілектерін жаудырған. Көпшілік ерекше сәтті ұялы телефонға түсіріп, естелікке суретке де түскен.
Жас жұптың айтуынша, олар дәл осы күні екі маңызды шешім қабылдаған: бірі – ел болашағына қатысты таңдау жасау болса, екіншісі – өздерінің ортақ болашағын бірге құру. Осылайша, референдум күні олар үшін тек қоғамдық маңызы бар күн ғана емес, өмірлеріндегі ең есте қаларлық сәттердің біріне айналды.
