Бүгін, 10:41
Белгілі қазақстандық боксшы Теміртас Жүсіпов пен оның жұбайы қазақстандықтарға үндеу жасап, татуласқанын хабарлады. Спортшының жары бұрын берген арызын қайтарып алғанын растады, деп хабарлайды kznews.kz.
Боксшының Instagram парақшасында ерлі-зайыптылардың бірлескен видеомәлімдемесі жарияланды. Онда олар отбасын сақтап қалу туралы ортақ шешімге келгендерін айтты.
"Отбасымызға қатысты түрлі әңгіме мен қауесет көбейгендіктен, бұл үндеуді бірге жазуды жөн көрдік. Иә, арамызда отбасылық жанжал болды. Екеуіміз де қорытынды жасап, байыппен сөйлестік және отбасымызды сақтап қалу туралы ортақ шешім қабылдадық. Біздің шешімімізге және жеке өмірімізге құрметпен қарауды сұраймыз", – деді боксшы.
Теміртас Жүсіповтің жұбайы бұл шешімге өз еркімен келгенін және оған ешкім қысым көрсетпегенін атап өтті.
"Жеке өз атымнан айтарым: арызымды қайтарып алу және қылмыстық істі тоқтату туралы өтініш беру туралы шешімді өз еркіммен қабылдадым. Маған ешқандай қысым көрсетілген жоқ. Жеке өмірімізге құрметпен қарап, отбасымызға алдағы уақытта тыныш өмір сүруге мүмкіндік берулеріңізді сұраймыз. Түсіністік танытқандарыңызға рақмет", – деді ол.
