Бүгін, 16:38
Алматы қаласы мен Алматы облысында электр энергиясының тарифі қымбаттауы мүмкін.
Аймақты қуат көзімен қамтитын "АлматыЭнергоСбыт" компаниясы тарифті қазіргі 36,33 теңгеден 39,36 теңгеге дейін арттыруды көздеп, монополияға қарсы органға өтініш берген.
Егер ұсыныс мақұлданса, жаңа тариф 20 тамыздан бастап күшіне енуі мүмкін. Яғни, электр қуаты үшін тарифтің 8,3 пайызға немесе 3,03 теңгеге өсуі күтілуде. Бұл бағаның бәрі қосымша құн салығынсыз көрсетілген.
Айтпақшы, бұған дейін электр энергиясының тарифі 5 маусымда ғана көтерілген болатын. Ал монополист компания тарифті қайта қарауға электр энергиясын сатып алу бағасының өсуін себеп ретінде келтіріп отыр екен. Атап айтқанда, 15 - шілдеден бастап сатып алу құны бір киловатт-сағатқа 13 теңгеден 16 теңгеге дейін өскен. Бұл шамамен 23 пайыздық өсім.
Қалай болғанда да электр энергиясының жаңа тарифі бойынша түпкілікті шешімді Табиғи монополияларды реттеу комитетінің департаменті қабылдайтын болады.
