9 ақпан, 2026
Құлсары қаласындағы мектептегі жанжалға қатысты тергеу әлі аяқталған жоқ. Соған қарамастан, сот шешімімен үйқамаққа алынған жасөспірім оқуын қайта жалғастырды, деп хабарлайды kznews.kz.
Оқушының сабаққа оралғанын Атырау облыстық білім басқармасы "Ақ Жайық" басылымына растаған.
Ведомство мәліметінше, жарақат алған екі оқушы қазір ем қабылдап жатыр. Ал бұған дейін айтылған балта тергеу барысында табылмаған.
Сондай-ақ жасөспірімнің ауылдар арасындағы төбелестерге қатысы болуы мүмкін деген ақпарат тексеріліп жатыр. Бұл эпизод бойынша әзірге нақты қорытынды жасалған жоқ.
"Тергеу қорытындысы бойынша түпкілікті шешім қабылданады", – деді Атырау облыстық білім басқармасының басшысы Марат Әбуов.
Басқарманың нақтылауынша, жасөспірімдер бұған дейін бір-бірімен достық қарым-қатынаста болған. Алайда соңғы уақытта олардың арасында жанжал туындаған. Алдын ала болжам бойынша, бұл қақтығыс оқушылардың бірінің араласатын ортасының өзгеруіне байланысты болуы мүмкін.
