Бүгін, 09:48
Ақмола облысының Қосшы қаласында орналасқан қоғамдық мәдени-спорт кешенінде қайғылы оқиға тіркелді: жаттығу барысында 10 жасар оқушының жағдайы күрт нашарлап, ол сол жерде көз жұмды, деп хабарлайды Kznews.kz.
Алдын ала дерекке сәйкес, марқұм қыз «бронх демікпесі» диагнозымен диспансерлік есепте тұрған. Сабақ кезінде денсаулығы сыр берген соң, оқиға орнына жедел жәрдем шақырылған. Жағдайы ауырлағандықтан, арнайы жабдықталған реанимобиль де жұмылдырылғанымен, дәрігерлер баланы аман алып қала алмады.
Қазір оқиғаның мән-жайын құзырлы органдар анықтап жатыр. Ақмола облыстық полиция департаменті ахуалға қатысты төмендегідей мәлімдеме жасады.
«Кәмелетке толмаған баланың өлімі туралы дерек Қосшы қалалық полиция бөлімінде тіркелді. Қазіргі уақытта оқиғаның барлық мән-жайын анықтау үшін тергеу амалдары жүргізіліп жатыр. Тексеру нәтижесі бойынша түпкілікті процессуалдық шешім қабылданады».
Тергеу қорытындысына қарай спорт кешені қызметкерлерінің немесе өзге де жауапты тұлғалардың әрекетіне құқықтық баға берілетіні хабарланды.
