Қазақстандықтар күніне 8 миллиард теңге сомасына 500 мың транзакция жүргізеді - Қаржы-қаражат
Күн сайын Қазақстан халқы цифрлық банкинг арқылы 8 миллиард теңге сомасына шамамен 500 мың транзакция жүргізеді. Бұл туралы Қазақстан Ұлттық банкі төрағасының орынбасары Жанат Құрманов AstanaHub Халықаралық IT-стартаптар технологиялық паркі алаңында сөйлеген сөзі барысында мәлімдеді, - деп хабарлайды Тengrinews.kz тілшісі.
"Бүгінде қаржы транзакцияларының негізгі бөлігі Интернет-және мобильдік банкинг арқылы жүргізіледі. Қазақстанның қаржы ұйымдары жеткілікті түрде цифрлық шешімдерді белсенді қолданады және жаңа технологияларды енгізуде тұрақты жұмыс істейді", - деп түсіндірді Жанат Құрманов.
Қазақстан Ұлттық банкінің деректері бойынша, бизнес субъектілерінің қаржылық операцияларының 70 пайызы қашықтықтан көрсетілетін сервис арқылы жүргізіледі. Интернет/мобильдік банкинг арқылы жүргізілген төлемдер көлемі 2016 жылмен салыстырғанда 2017 жылы 3 есе ұлғайды.
AstanaHub форумы шеңберінде қаржы секторын цифрландыру мәселелері, сондай-ақ Қазақстан Ұлттық банкінің қызметін автоматтандырудың ағымдағы міндеттері талқыланды. Төрағаның орынбасары Жанат Құрманов Ұлттық банктің ақпараттық жүйелерін жетілдіру, атап айтқанда, Ұлттық банктің интернет-ресурсының жаңа нұсқасын, деректерді басқару жүйесін, сондай-ақ модельдеу және дамыған талдама жүйесін құру жөніндегі алдағы жобалар туралы хабарлады.
Осы жобаларды іске асыруға IT-қоғамдастықтың өкілдері мен компаниялар конкурстық негізде қатыса алатынын атап өтеміз. Жүргізілетін сатып алулар туралы ақпарат Қазақстан Ұлттық банкінің Интернет-ресурсына (www.nationalbank.kz) орналастырылады.
