Қазақстандық Ulytau Group құрылыс компаниясы спортшы Михаил Шайдоровқа New City Life тұрғын үй кешенінен үш бөлмелі пәтер тарту ететінін мәлімдеді, деп хабарлайды kznews.kz.
Компания өз шешімін Instagram парақшасындағы сторис арқылы жариялап, спортшыны құттықтады.
Сонымен қатар, өкілдері әзірге Шайдоровпен тікелей байланыс орната алмағандарын айтты. Сол себепті қуанышты хабарды жеке жеткізіп, баспананы табыстау жайын талқылау мүмкін болмай отырғанын жеткізді.
«Біз Михаил Шайдоровқа жеке хабарласып, оны құттықтап, Ulytau Group атынан үш бөлмелі пәтерді сыйлағымыз келеді. Алайда әзірге онымен байланыса алмадық. Егер оның байланыс деректерін білсеңіздер немесе бұл ақпаратты жеткізуге көмектесе алсаңыздар, бізге хабарласыңыздар. Бұл жақсы жаңалықты өз чемпионымызбен бөлісуді қалаймыз», — делінген компанияның жазбасында.
Айта кетейік, бұған дейін қазақстандық танымал әнші Димаш Құдайберген де мәнерлеп сырғанаушы Михаил Шайдоровты Олимпиада ойындарындағы алтын жүлдесімен құттықтап, оған автокөлік сыйлайтынын мәлімдеген еді.