Бүгін, 12:07
Тайландтың Пхукет аралында Қазақстан азаматшасының қатысуымен болған оқиға жергілікті тұрғындар мен құқық қорғау органдарының назарын аударды. Алдын ала мәлімет бойынша, 30 жастағы қазақстандық әйел көлікпен қауіпті қозғалыс жасап, бірнеше жол-көлік оқиғасына себеп болған, деп хабарлайды kznews.kz.
Куәгерлердің айтуынша, MG маркалы автокөлікті басқарған әйел бірнеше сағат бойы тасжолда ретсіз қозғалып, жол қозғалысының басқа қатысушыларына қауіп төндірген. Оның әрекеті салдарынан бірнеше көлік пен мотоцикл зақымданған.
Оқиғаның ең күрделі сәті Пхукеттегі ескі әуежай жолы маңында тіркелген. Сол жерде жүргізуші шағын автобуспен және тағы бір мотоциклмен соқтығысқан. Жол апатының салдарынан екі адам түрлі жарақат алып, медициналық көмекке жүгінген.
Тәртіп сақшылары көлікті тоқтатуға бірнеше мәрте әрекет жасағанымен, жүргізуші талапқа бағынбаған. Соңында полиция қызметкерлері арнайы операция жүргізіп, автокөліктің терезесін сындыру арқылы әйелді ұстаған.
Жергілікті ақпарат көздерінің мәліметінше, қазақстандық азаматша бұған дейін де осындай сипаттағы келеңсіз жағдайларға байланысты құқық қорғау органдарының назарына ілінген. Алдын ала болжам бойынша, оқиға кезінде ол ауыр эмоциялық күйзеліс жағдайында болуы мүмкін.
Қазіргі уақытта аталған оқиғаның барлық мән-жайы анықталып, тиісті тексеру жұмыстары жүргізіліп жатыр. Құқық қорғау органдары жол-көлік оқиғаларына байланысты процессуалдық шешім қабылдайды.
