Бүгін, 18:10
Қазақстанның Көлік прокуратурасы жолаушылар тасымалы бағыттарына қызмет көрсету құқығын беру кезінде өткізілген конкурстардың заңдылығын тексерді. Нәтижесінде кей өңірлерде конкурсқа қатысушылардың құқықтары шектеліп, белгілі бір тасымалдаушыларға негізсіз басымдық берілгені анықталды, деп хабарлайды kznews.kz.
Прокуратураның мәліметінше, мұндай әрекеттер қолданыстағы заң талаптарына қайшы келіп, жолаушылар тасымалы нарығындағы адал бәсекелестік қағидатына нұқсан келтірген.
Тексеру қорытындысы бойынша прокурорлық қадағалау шаралары қабылданып, 10 лауазымды тұлға тәртіптік жауапкершілікке тартылды. Олардың қатарында облыс әкімінің орынбасары мен жергілікті атқарушы органдардың бірқатар басшысы бар.
«Лауазымды тұлғалардың кейбіріне атқаратын қызметіне толық сәйкес еместігі туралы ескерту жасалды. Қалғандарына сөгіс түріндегі тәртіптік жаза қолданылды», – делінген прокуратура хабарламасында.
Көлік прокуратурасы жолаушылар тасымалы саласында заң талаптарының сақталуын және конкурстардың ашық әрі әділ өтуін қамтамасыз ету бағытындағы бақылауды жалғастыратынын мәлімдеді. Мамандардың айтуынша, бұл шаралар тасымалдаушылар арасында тең бәсекелестік қалыптастырып, тұрғындарға көрсетілетін қызмет сапасын арттыруға бағытталған.
