Бүгін, 17:51
"Қазгидромет" РМК 28-30 мамырға ауа райы болжамын жариялады, деп хабарлайды kznews.kz.
Мамыр айының соңғы күндері республика аумағында ауа райы құбылмалы болады деп күтілуде. Қазақстанның басым бөлігінде солтүстік-батыс циклоны мен оған байланысты атмосфералық фронттардың әсерінен жаңбыр жауып, найзағай ойнайды.
Батыс және солтүстік-батыс өңірлерде бүкіл кезең бойы, 28 мамырда оңтүстік, оңтүстік-шығыс және орталық аймақтарда, ал 28-29 мамыр күндері солтүстік пен шығыста қатты жаңбыр жауып, бұршақ түсіп, екпінді жел соғады. Республика бойынша желдің күшеюі күтіледі.
Күндізгі ауа температурасы:
* батыста 15-25 градус жылыға дейін төмендейді;
* кезеңнің басында солтүстік-батыста, солтүстікте және орталықта 17-25 градус жылыға дейін төмендеп, кезең соңында 20-33 градус жылыға дейін көтеріледі;
* шығыста 15-25 градустан 20-30 градус жылы аралығында құбылады;
* оңтүстік пен оңтүстік-шығыста кезең басында 20-28 градус жылыға дейін төмендеп, соңында 27-38 градус жылыға дейін көтеріледі.
