Бүгін, 11:36
Қазақстанда жұмыс күші жетіспейтін өңірлерге азаматтарды ерікті түрде көшіруге арналған мемлекеттік бағдарлама жаңартылып жатыр. Өзгерістер қоныс аударушыларға көрсетілетін қаржылық және әлеуметтік қолдауды кеңейтуді көздейді, деп хабарлайды kznews.kz Еңбек және халықты әлеуметтік қорғау министрлігіне сілтеме жасап.
Бағдарламадағы негізгі өзгерістердің бірі – тұрғын үй алуға берілетін қаржылай көмектің көлемін арттыру. Енді экономикалық ұтқырлық сертификатының ең жоғары сомасы 7 млн теңгеге дейін жетеді. Қатысушылар бұл қаражатты жаңа қоныстанған өңірінен жеке үй сатып алуға жұмсай алады.
Министрлік бұл өзгерістер азаматтардың жаңа жерде баспанамен қамтылып, тұрақты өмір сүруіне қажетті жағдай жасауға бағытталғанын атап өтті.
Мемлекеттік қолдау тұрғын үй сатып алуға берілетін сертификатпен ғана шектелмейді. Қоныс аударушыларға көшу шығындарына субсидия қарастырылған. Бұдан бөлек, тұрғын үйді жалдау және коммуналдық қызметтерге жұмсалған қаражаттың бір бөлігі өтеледі. Жаңа өңірге барған азаматтарға жұмысқа орналасу мәселесінде де көмек көрсетіледі.
Қатысушылардың жұмыс іздеу үшін алдымен қоныс аударуын күтудің қажеті жоқ. Олар көшпей тұрып-ақ бос жұмыс орындарымен танысып, өзіне қолайлы жұмыс берушіні таңдай алады. Бұл үшін қабылдаушы өңірлердің өкілдері қоныс аударушылар шығатын аймақтарда тұрақты түрде бос жұмыс орындары жәрмеңкесін өткізеді.
Сонымен бірге бағдарламаға қатыса алатын азаматтар санаты да кеңейтілді. Егер бұған дейін мемлекеттік қолдау негізінен жұмыссыз адамдарға бағытталса, енді еңбек нарығында сұранысқа ие мамандар мен шаруа және фермер қожалықтарының басшылары да осы мүмкіндікті пайдалана алады.
Бағдарлама қызметтері толықтай цифрландырылған. Азаматтар өтінімді онлайн беріп, өңірлер картасын қарап, сұранысқа ие мамандықтар тізімімен таныса алады. Сондай-ақ өзіне сәйкес бос жұмыс орнын таңдау мүмкіндігі бар. Барлық қызмет migration.enbek.kz порталы арқылы қашықтан көрсетіледі.
Бағдарлама іске қосылған 2017 жылдан бері оған 73,9 мың адам қатысқан. Жұмыспен қамтуға бағытталған мемлекеттік қолдау шараларының нәтижесінде олардың 31 мыңы тұрақты жұмысқа орналасқан.
