Бүгін, 11:15
Қазақстанда жұмыс беруші міндетті түрде төлеуге тиіс ақылы демалыс күндері енгізіледі, деп хабарлайды kznews.kz.
Сенат еңбек заңнамасына енгізілген түзетулерді мақұлдады. Негізгі өзгеріс барлық жұмыс істейтін қазақстандықтарға қатысты.Енді жұмыс берушілер қызметкерлерге скринингтік тексерулерден өту үшін уақыт беруге міндетті, бұл кезде жұмыс орны мен орташа жалақысы сақталады. Бас тартуға болмайды.
Өтініш емес, адам құқығы
Медициналық ұйымдар цифрлық жүйелер арқылы жұмыс берушілерге қызметкерлердің скринингтік тексеруден өту қажеттілігі туралы хабарлама жібереді. Хабарлама алынғаннан кейін жұмыс беруші қызметкерге тексеруден өту үшін уақыт беруге міндетті, бұл кезеңде жалақысы мен жұмыс орны сақталады.
Бұл уақытты бермеу заң бұзушылық болып саналып, жұмыс беруші жауапкершілікке тартылады.
Қызметкерлер үшін тағы қандай өзгерістер бар
Еңбек қатынастары саласында қызметкерлердің жеке өмірін, ар-намысын және қадір-қасиетін қорғау нормалары енгізіледі. Яғни, жұмыс беруші жұмыс қажеттілігі деген желеумен қызметкердің жеке кеңістігіне негізсіз араласа алмайды.
Жұмыс берушілер үшін өзгерістер
Жұмыс берушілерге еңбек қауіпсіздігі және еңбекті қорғау талаптарына сәйкес жағдай жасау міндеті заң жүзінде бекітіледі. Бұл жаңа талап емес, бірақ енді оның құқықтық негізі күшейтіледі. Сонымен қатар кәсіпорындарда еңбекті қорғау бойынша техникалық инспекторлардың өкілеттігі кеңейтіледі, олар өндірістегі талаптардың сақталуын тікелей тексере алады.
Есептілік артады
Аймақтық деңгейде жұмысшылар, жұмыс берушілер және мемлекет арасындағы әлеуметтік әріптестік тетігі күшейтіледі. Осы әріптестік аясындағы келісімдердің орындалуы туралы есептерді тыңдау міндеті енгізіледі, яғни енді келісімдерді тек қол қоюмен шектелмей, олардың қалай орындалып жатқаны туралы жария түрде есеп беру қажет болады.
Бұған дейін бұл мәселе Мәжілісте көтерілген еді. Депутаттар халықтың бұл құқық жөнінде ақпараттандырылуын арттыру қажет екенін атап өтті. Қолданыстағы заңнамаға сәйкес, қазақстандықтарға жыл сайын медициналық тексеруден өту үшін үш күнге дейін ақылы демалыс беріледі. Алайда, депутаттардың айтуынша, азаматтардың көпшілігі бұл мүмкіндіктен хабарсыз немесе оны пайдаланбайды.
Мәжіліс өкілдері әлеуметтік демалысқа қатысты норма бірнеше жылдан бері бар болғанымен, оның тәжірибедегі тиімділігі төмен екенін айтты. Қызметкерлер бұл құқықты сирек қолданса, жұмыс берушілер де оны түсіндіруге жеткілікті көңіл бөлмей отыр.
