Ресей президенті Владимир Путин Рождество мерекесі мен алдағы 2026 жылға байланысты бірқатар шет мемлекеттердің басшыларына құттықтау жеделхаттарын жолдады. Бұл туралы Кремль мәлімдеді, деп хабарлайды kznews.kz.
Құттықтау алғандар қатарында ТМД және Орталық Азия елдерінің жетекшілері бар. Атап айтқанда, Қазақстан президенті Қасым-Жомарт Тоқаев, сондай-ақ Әзербайжан, Армения, Беларусь, Қырғызстан, Тәжікстан, Түрікменстан және Өзбекстан президенттеріне құттықтау жолданған. Сонымен бірге Абхазия мен Оңтүстік Осетия басшылары да тізімге енген.
Бұдан бөлек, Владимир Путин бірқатар алыс шетел мемлекеттерінің лидерлеріне де жаңа жылдық және рождестволық құттықтау хаттарын жіберді. Олардың арасында Қытай төрағасы Си Цзиньпин, АҚШ президенті Дональд Трамп, Түркия президенті Режеп Тайип Ердоған, Венгрия премьер-министрі Виктор Орбан, Бразилия президенті Луис Инасио Лула да Силва, сондай-ақ Үндістан, Индонезия, Вьетнам, Венесуэла, Куба, Моңғолия, Лаос, Мьянма, Сербия, Словакия, Эфиопия және Оңтүстік Африка Республикасының басшылары бар.
Кремльдің мәліметінше, құттықтау жеделхаттары бұрынғы мемлекет және үкімет басшыларына да жіберілген. Олардың қатарында Қазақстанның тұңғыш президенті Нұрсұлтан Назарбаев, Кубаның экс-көшбасшысы Рауль Кастро, Арменияның бұрынғы президенттері Роберт Кочарян мен Серж Саргсян, сондай-ақ Германияның бұрынғы канцлері Герхард Шрёдер бар.
