Бүгін, 10:47
Президент Қасым-Жомарт Тоқаевтың жарлығымен Қазақстанның бірқатар шет мемлекеттердегі елшілері тағайындалып, дипломатиялық корпуста кадрлық өзгерістер жасалды, деп хабарлайды kznews.kz.
Ақорда мәліметінше, Әбілқайыр Сқақов Қазақстанның Қырғызстандағы, Бақыт Батыршаев – Қатардағы, Анель Бақытбекқызы – Мажарстандағы, ал Болат Иманбаев Сербиядағы Төтенше және Өкілетті Елші болып тағайындалды. Осыған байланысты Болат Иманбаев Армениядағы елші қызметінен босатылды.
Сондай-ақ Қазақстанның Үндістандағы елшісі Азамат Есқараевқа Бангладеш, Бутан, Мальдив және Непалдағы Қазақстан елшісі қызметін қоса атқару міндеті жүктелді.
Президент жарлығымен Рәпіл Жошыбаев (Қырғызстан), Арман Исағалиев (Қатар), Абзал Сапарбекұлы (Мажарстан) және Мәди Атамқұлов (Сербия) елшілік қызметтерінен босатылды.
Кадрлық өзгерістер туралы толық ақпарат Ақорданың ресми жарлығында жарияланды.
