Бүгін, 16:25
Астанада қаржы жымқыру ісі бойынша сотталған Перизат Қайратке тиесілі болған көлік аукционға шығарылды, деп хабарлайды kznews.kz.
Сатылымға қойылған автокөлік – 2024 жылы шыққан қара түсті Mercedes-Benz S450. Мемлекеттік нөмірі – 777KPK01. Көліктің бастапқы бағасы 79,4 миллион теңге деп белгіленген.
Мәліметке сәйкес, өтінім қабылдау қазірдің өзінде басталған, ал сауда-саттық 7 сәуірде өтеді. Автокөлік мемлекеттік мүлік департаментінің балансында тұр.
Сонымен қатар техникалық жағдайына толық баға беру әзірге мүмкін емес: аккумуляторы отырып қалған. Көлікке арест салынып, оған қатысты бірқатар шектеулер де енгізілген.
Айта кетейік, мұндай мүліктер әдетте сот үкімі негізінде мемлекет кірісіне тәркіленіп, кейін ашық аукцион арқылы сатылады.
